1813 FILEMÓN

FILEMÓN

Philemon Phmmat chj Filemón 12/09/06 Ambrocio, Elena de Ekstrom Chuj San Mateo Ixtatán

A Scarta San Pablo

DßA VIÅAJ FILEMÓN Filemón sbßi jun carta tic, aton jun scarta viåaj apóstol Pablo stzßibßejbßat dßa viåaj Filemón. Ojtacabßil viåaj Filemón chiß yuj screyenteal dßa iglesia dßa Colosas. Ay jun schecabß viå scuchan Onésimo, bßat viå elelal. Palta yil-lajelta sbßa viå yedß viåaj Pablo dßa yol preso. Axo ix aji, ix och viå creyenteal ayic ix yalan vachß abßix viåaj Pablo chiß dßa viå. Ix yalbßat viåaj Pablo chiß dßa viåaj Filemón chiß to syacß nivancßolal viåaj Onésimo chiß viå, vachßocabß syutej viå schaan viå scßochxi, yujto creyentexo viå. Yucßtacxo sbßa ebß viå dßa sbßi Cristo, xajanocabß viå yuj viåaj Filemón chiß. Tzßel yich scarta viåaj Pablo 1 A in Pablo in tic, ay in och dßa preso, yujto svacßoch in pensar dßa Cristo Jesús. A in yedß viå cucßtac Timoteo, sco tzßibßejbßat jun co carta tic dßayach ach Filemón. Te xajan ach cuuj, yujto quetbßeyum co bßa dßa smunlajel Dios. 2 Tzacß stzatzil scßool ebß creyente smolbßej sbßa dßa a pat. Tzacßpax stzatzil scßool ix canabß Apia yedß viå cucßtac Arquipo, yujto syacßpax val yip viå dßa yic Dios quedßoc. 3 Aocabß co Mam Dios yedß Cajal Jesucristo syacß svachßcßolal yedß sjuncßolal dßayex taß. Xajan Jesús yuj viåaj Filemón 4 Ayic tzin lesalvi, svacß val yuj diosal dßa Dios uuj, 5 yujto svabß dßa tic to tzacß val och Cajal Jesús dßa a cßool. Svabßi to te xajan Cajalil chiß uuj, tza xajanej pax masanil ebß yicxo Dios. 6 Ay ebß syacßoch Cristo dßa scßool uuj, yujto ix acßoch dßa a cßool. Tzin cßan dßa Dios, yic ol vachß nachajel yuj ebß to a Cristo Jesús tzßacßan masanil tas vachß dßayoå.

Philemon Phmmat chj Filemón 12/09/06 Ambrocio, Elena de Ekstrom Chuj San Mateo Ixtatán

a 1.11

7 Tzin te tzalaj val uuj ach vucßtac, yujto tza xajanej ebß taß. Uuj sjavi snivanil in cßool dßa tic, yujto tzacß val stzalajcßolal ebß creyente taß. Tas scßan viåaj Pablo yuj viåaj Onésimo 8 Yujto tza xajanej ebß yicxo Dios chiß, yuj chiß ijan tzin tecßbßej in bßa ach in checan yuj tas yovalil tza cßulej taß. 9 Palta mantoc tzach vacß mandar. Toåej tzin cßan dßayach yic ol checlajeloc to sco xajanej co bßa. A in Pablo in tic, icham vinac in xo. A ticnaic, ayinto och dßa preso, yujto svacßoch in pensar dßa Cristo Jesús. 10 Tzin cßan val dßayach yuj viåaj Onésimo, yujto icha vuninal ix aj viå dßa yol preso tic, yujto ix scha Cristo viå vuuj. 11 A dßa yalaåtaxo ayic ix ach yacßan servil viå, malaj jabßoc yopisio viå dßayach. Axo ticnaic, te ay yopisio viå dßayach a yedß pax dßayin. 12 Yuj chiß, tic tzin checbßat viå dßayach. Tza cha viå scßochi, icha tzutej a chaan in cßochi. 13 In gana ix aj viå vedß dßa tic, yic tzin yacß servil

Onésimo, syalelcßochi “Te ay yopisio.” Biblia en Chuj de San Mateo Ixtatán, 1ra ed. © 2007, Sociedad Bíblica de Guatemala

FILEMÓN

1814

viå, yic ichato a ach tzul in acß servil dßa yol preso tic. Ay in och dßa preso yujåej to svalel vachß abßix yic colnabßil. 14 Palta malaj in gana tzin bßabßlaj bßoej in trato yedß viå masanto tzin cßanbßej vabß dßayach. Yujto in gana, to tzßel val dßa a cßool tzacß pavor dßayin yedß viå, maå acßbßiloc pural tzach vutej. 15 Yel toni, ix el viå elelal dßayach jayeß cßual. Palta icham chiß ix aji yic tzßajxi viå dßayach dßa junelåej. 16 A ticnaic maåxo checabßocåej yaj viå dßayach. Másxo nivan yopisio viå, yujto cucßtacxo viå. Te xajanabßil viå vuuj. A achxo, másxo val tza xajanej viå ayic ol cßochxoc viå dßayach. Maå yujoc to a checabß viå tza xajanej viå, palta yujto yicxo Cajalil yaj viå quedßoc. 17 Yuj chiß, tato tza na vedßoc to quetbßeyum co bßa, tza cha viå scßoch taß ichato a in tzin cßochi. 18 Tato ay sbßoc viå dßayach, ma ay junocxo smul viå ix ochi, tzacßcan dßa in cuenta. 19 A in Pablo in tic ol vacß sbßoc viå chiß dßayach, yuj chiß svacß in tiß, tzin tzßibßanpaxbßat

dßayach yedß in cßabß. Palta ojtac paxi, ichato ay a bßoc dßayin, yujto vuuj ix a cha Cristo. 20 Yuj chiß vucßtac, acß pavor dßayin dßa sbßi Cajal Jesús. Acß in tzalajcßolal yuj Cristo. 21 Svalbßat juntzaå tic dßayach, yujto tza cßanabßajej val. Vojtac to maåocåej tas svalbßat tic dßayach ol a cßulej, palta ol ecß dßa yibßaå a cßulan juntzaåxo tas. 22 Svalpaxbßat junxo tic dßayach to tzacß lista jabßoc in posado taß. Talaj icha chiß ol el dßa scßool Dios, ol in yacßbßat dßayex taß, icha tzßaj e cßanan dßa e lesal. Stzatzil scßool viåaj Filemón 23 A viå cucßtac Epafras tic, syacßbßat stzatzil a cßool viå. Ayto ochta viå dßa preso tic vedßoc, yujto syacßpaxoch spensar viå dßa Cristo Jesús. 24 Axo ebß smunlaj vedß dßa tic, aton viåaj Marcos, viåaj Aristarco, viåaj Demas yedß viåaj Lucas, syacßpaxbßat stzatzil a cßool ebß viå. 25 Aocabß Cajal Jesucristo syacß svachßcßolal dßayex taß.

Biblia en Chuj de San Mateo Ixtatán, 1ra ed. © 2007, Sociedad Bíblica de Guatemala