Abrahamwã ded pah ĩ jʉmat naáwát Génesis 12 – 20
Abrahamwã ded pah ĩ jʉmat naáwát Génesis 12 – 20 en cacua
edición provisional julio 2011
© 2014, Wycliffe Bible Translators, Inc.
Texto por Emilio López López Dibujos por cortesía de David C. Cook Foundation
1
Abramdih Dios ã ejat Génesis 11.27-12.9 Dawá jópchi tʉ́ttimah, Babel ã jʉmʉpji pebhbit jʉmni Caldéa baác, Ur tʉ́tchiboó Abram wʉ̃t jʉmni ãt jʉmʉp wʉt jĩ. Ã íip Taré, ã ʉ́ʉdwã Nahor, Haránbʉt caán tʉ́tchiboó ĩt jʉmʉp wʉt jĩ. Harán wʉ̃ʉ́h, Lot, ã weh yata Milcá, Iscábʉt ĩjeéh ĩt jʉmʉp wʉt jĩ. Nahorboó ã ʉ́ʉd Harán nʉʉ́m, Milcádih ãt áa jʉmʉp wʉt jĩ. Ã wẽp jeñé Abram, Sarai wʉ̃t jʉmnihdih ãt áa jʉmʉp wʉt jĩ. Tʉ́ttimah, Ur tʉ́tchiboó ĩ jʉm jwʉhʉchah, Abram ʉ́ʉd Haránboó ãt wʉnʉp wʉt jĩ. Obohjeéhtih, caán baácdih moón Dios yoobátdih jéihcan, yeó, widh, cʉ́iwãdihbʉt ĩpĩ ́ ʉʉ́bʉ́p wʉt jĩ.
2
Páant ĩ wẽi ʉʉ́bʉ́chah ennit, Dios Abramdih nin pah ãt niijíp wʉt jĩ: “Míih baácdih, ma déewãdih, ma íipdih yʉh bʉca cádahnit, wã jʉ́ʉtni baác pínahna ma bejeé. Caánboó dawá yoobát ma jʉimená pínahdih wã cãá c pooabipna caá. Meemdíh chah wʉ̃t yáani wã chãjbipna caá. Meemdíh tʉ́i chãjnitdih, wã tʉ́i chãjbipna caá. Meém, weemdíh ma tʉ́i jepahat jíib, nihat baácdih moondíh wã tʉ́i chãjbipna caá.”, Dios ãt niijíp wʉt jĩ.
Obohjeéhtih, Sarai, Abram áaboó, weh wihcannih mit jʉmʉp wʉt jĩ. Páant mi jʉmʉchah yʉhna, Dios ded pah caántdih ã chãjat pínahdih jéihna, “Ma jʉimená dawá ĩ jʉmbipna caá”, Abramdih ãt niijíp wʉt jĩ.
3
Pánihna, Dios caandíh ã wʉtat pah ãí h baác, Ur tʉ́tchimant Abramwã ĩt bejep wʉt jĩ. Pánih ãí h baácmant ã bac láa, Abram setenta y cinco jópchi ãt bíbohop wʉt jĩ. Pánih bejnit, Abram, ĩ wʉ̃ʉ́h Lot, ã íip Taré, ãjeéh bóli Sarai, Nahorwãbʉt, Harán wʉ̃t jʉmni baácna ĩt jwíih jʉibínap wʉt jĩ. Pánihna, Harán baácboó ĩ jʉm jwʉhʉchah, Abram íip Taré ãt wʉnʉp wʉt jĩ. Páant ã íip ã wʉnat tʉ́ttimah, Dios caandíh ã jwʉ́ʉb wʉtʉchah, Abramwã Canaán baácna ĩt jʉibínap wʉt jĩ. Obohjeéhtih, Abram weép jeñé, Nahor ã déewã biícdih Harán baácboó ĩt chãwáp wʉt jĩ. Páant Abramwã bejna, ã jenah joyátjeh ã jʉmni baácmant bejna ãt chãjcap wʉt jĩ. Dios ã wʉtatdih jepahna, páant ãt chãjap wʉt jĩ.
4
Pánih Canaán baácna jʉbínit, “Ma jʉimenádih nin baácdih wã wʉ̃hbipna caá”, Dios ã niijíchah joinít, nihat pebhboó ãt táoh en jibip
wʉt jĩ. Pánih en jib bejna, chóop yapapmant pʉ́ʉ́ Egipto baác pebh jʉmni Néguev wʉ̃t jʉmʉpna ãt jʉibínap wʉt jĩ. Nihat ã en jib bejni baác tʉ́ini míic ãt jʉmʉp wʉt jĩ. Abramboó Diosdih tʉ́i oini jʉmna, ã chéen yoobát ãt jʉmʉp wʉt jĩ.
5
Jwiítbʉt biíc yoobó Diosdih jwĩ tʉ́i jenah joyóchah, caánboó jwĩ chéen yoobát ã jʉmna caá. Meemdíh, weemdíhbʉt Dios bʉ́dí ã oina caá. Abram deyoób ã bejechah, ãjeéh Dios ãt jʉmʉp wʉt jĩ. Jwiítdihbʉt deyoób jwĩ bejechah, Dios jwĩjeéh ã jʉmna caá.
Abram Egiptoboó ã jʉmat Génesis 12.10-20 Tʉ́ttimah, Abramwã Canaán baácboó ĩ jʉmʉchah, nihat caánboó jʉmnitdih nʉgʉ́p láa ãt bejep wʉt jĩ. Pánihna, dedboo póhba ĩ jeémát pínahdih ĩt bid jʉicáp wʉt jĩ. Canaán baácdih moonbʉ́t ĩ jeémát pínahdih ĩt bid jʉicáp wʉt jĩ. Egipto baácdih moon póhba jeémát ĩt bíbohop wʉt jĩ. Pánihna, caánboó jeémát ĩ bíbohat doonádih Abramwã ĩt joyóp wʉt jĩ. Caán doonádih joinít, Abramwã Egipto baácna ĩt bejep wʉt jĩ. Pánih Egipto baácna bejna, Abram yad Saraidih ennit, mi tʉ́i jígohochah, “Caántdih náahnit, weemdíh ĩ mao yohbipna caá”, ãt niíj jenah
6
joí ʉ́ʉmʉp wʉt jĩ. Páant niíj jenah joí ʉ́ʉmnit, yad Saraidih nin pah ãt niijíp wʉt jĩ: “Meém tʉ́i jígohnih caá. Pánihna, Egiptodih moón ma tʉ́i jígohatdih ennit, ‘Wãjeéh bóli caá’, wã niijíchah, meemdíh náahna, weémboodíh ĩta mao yoh taga. Pánihna, weemdíh ĩ mao yohcat pínah niijná, ‘Weém Abram jwan caá’, Egiptodih moondíh ma niijí”, Abram ãjeéh bólidih ãt niijíp wʉt jĩ. Pánihna, Egipto baácna ĩ jʉibínachah, maáh faraóndih teo wʉ̃hnit, caánt mi tʉ́i jígohatdih ĩt enep wʉt jĩ. Sarai tʉ́inih yoobát mit jʉmʉp wʉt jĩ. “¿Dedh tigaá, meém”? ĩ niíj ʉʉ́bh joyóchah “Weém Abram jwan caá”, mit niíj yee jepahap wʉt jĩ.
7
Páant mi niíj yee jepahachah joinít, ĩ maáh faraóndih mi tʉ́i jígohatdih ennitji ĩt naáwáp wʉt jĩ. Waícanjeh Egiptodih bóo maáh Saraidih ã pebhna ãt ʉb bejat tʉ́ʉtʉp wʉt jĩ. Pánihna, ãí h cãá cwã faraón pebhna Saraidih ĩt ʉb jʉibínap wʉt jĩ. Obohjeéhtih, Saraidih faraón ãt yéej chãjcap wʉt jĩ. Faraón, Saraidih ã ʉbat peéh, yeejép wʉnat nihat Egipto baácdih moondíh Dios ãt wahap wʉt jĩ. “Sarai Abram áa caá. Pánihna, caántdih ma teoca bojoó”, Dios faraóndih ãt niijíp wʉt jĩ. Dios páant ã niijíchah joinít, faraón caandíh ãt jepahap wʉt jĩ. Pánih jepahnit, faraónboó Sarai jíib, Abramdih dawá teo wʉ̃hnit neoná, teo wʉ̃hnit yaádh, ovejawã, camellowã, burrowãdih yʉh bʉca, ãt wʉ̃hʉp wʉt jĩ. Pánih wʉ̃hniji yʉhna, ã wʉ̃hninadih jwʉ́ʉb dʉ́ʉc wáican, Abramdih Saraidih jwʉ́ʉbanit, waícanjeh faraón ãí h baácmant ãt jwʉ́ʉb bejat tʉ́ʉtʉp wʉt jĩ.
8
Pánihna, Abram yad Saraidih jwʉ́ʉb ʉbnit, Egipto baácmant ãt jwʉ́ʉb bejep wʉt jĩ. Pánih jwʉ́ʉb bejna, Abram chah dawá nʉñʉ́pwã, cãá cwãdihbʉt ãt bíbohop wʉt jĩ.
9
Abram Lotjĩh ĩ míic pahat Génesis 13 Abramwã Egipto baácmant jwʉ́ʉb jʉ̃óhna, yoobópdih Néguevna ĩt jwʉ́ʉb jʉyʉ́p wʉt jĩ. Pánih jwʉ́ʉb jʉinít, Abram Lotjĩh dawá ovejawãdih ĩ bíbohat jíib, yílip peéh queét ovejawã en daonítboó ĩt míic jʉ̃ihñʉp wʉt jĩ Pánihna, Abram Lotdih nin pah ãt niijíp wʉt jĩ: “Jwiít biícdih jwĩ jéih jʉmcan caá”, ãt niijíp wʉt jĩ. Pánihna, Lot ã wẽi enni baácdih ñíonit, Sodoma tʉ́tchina ãt bejep wʉt jĩ. Pánih bejna, Lot ã íbi Abramdih mácah ĩt yoób jʉmʉp wʉt jĩ bʉca.
10
Pánihna, Lot ã bejat tʉ́ttimah, Dios Abramdih nin pah ãt niíj naáwáp wʉt jĩ: “Nin nihat ma enni baácboó ma jʉimená, dawá yoobát jʉmna, óondih jenah enna bʉʉjácat pah ĩ jʉmbipna caá”, ãt niijíp wʉt jĩ. Caán baácdih wʉ̃hat tʉ́ʉt niijná, Abram Ur tʉ́tchidih ã jʉm jwʉhʉchah, Canaán baácna Dios ãt jʉ̃ʉ́wát tʉ́ʉtʉp wʉt jĩ. Pánihna, Abram ã enni baácboó ã jʉimená ĩ jʉmat pínah niijná, Dios caandíh ãt naóh jwejep wʉt jĩ. Abramwã ĩ weh wih jwʉhcah yʉhna, “Ma jʉimená ĩ jʉmat pínah baác caá”, Dios ã niíj naáwáchah, “Jwiít jwĩ weh wihcan caá”, niíj jenah joicán, “Wã jʉimená ĩ jʉmat pínah baác tigaá”, caanjéh ãt niíj jenah joyóp wʉt jĩ. Pánihna, Abram Hebrón tʉ́tchi pebh jʉibínit, Mamré wʉ̃t jʉmni pebh ãt chãwáp wʉt jĩ. Caanjĩh́ jʉmna, cáag aabáni poómp chãjnit, Diosdih wẽina, nʉñʉ́pwãdih ãt mao cáo wʉ̃hʉp wʉt jĩ.
11
Abram Lotdih ã jwʉ́ʉb tʉ́i ʉbat Génesis 14 Lot ã íbi Abramdih mácah bejniji Sodoma tʉ́tchina ãt jʉibí jʉmʉp wʉt jĩ. Caán tʉ́tchiboó ã jʉm láa, bita maáta míic mawadih jʉinít, Sodoma, Gomorra tʉ́tchidih moondíhbʉt ĩt míic mao yap yohop wʉt jĩ. Pánih míic mao yap yohnit, Sodoma tʉ́tchidih moondíh ĩt teo bejep wʉt jĩ. Pánih
12
queétdih ʉb bejna, Lotwãdihbʉt ĩ ʉb bejechah, biíc jweiníboó Abramdih naáwádih ãt bejep wʉt jĩ. Abram pebhna jʉibínit, “Sodoma tʉ́tchidih moondíh teo bejna, Lotwãdihbʉt ĩ ʉb bejep be”, ãt niíj naáwáp wʉt jĩ. Páant ã niíj naáwáchah joinít, Abramboó trecientos dieciocho cãá cwãdih míic wáacnit, queétdih ñʉʉn béjna, Dan tʉ́tchina queétdih ĩt ñʉʉ́n jwãáh jʉibínap wʉt jĩ. Pánihna, cheiboó queétdih páantjeh ñʉʉnnít, pʉ́ʉ́ Hoba tʉ́tchina ñʉʉ́n jʉibínit, queétdih ĩt míic mao yap yohop wʉt jĩ. Pánih míic mao yap yohnit, ĩ ʉb bejnitjidih dʉ́ʉc wái, Lotwãdihbʉt ãt tʉ́i ʉbʉp wʉt jĩ. Pánih tʉ́i ʉbnit, Abramwã ĩ jwʉ́ʉb jʉ̃ʉ́wʉ́chah, Sodomadih bóo maáh queétdih jwãáádih ãt bejep wʉt jĩ. Diosdih teo wʉ̃hni Melquisedec wʉ̃t jʉmnibʉt, Abramdih weñedih jʉibína, pan, jiwá iguíh macjĩh ãt ʉb
13
jʉibínap wʉt jĩ. Pánih ʉb jʉibínit, Abramdih nin pah ãt niijíp wʉt jĩ: “¡Dios Chah Wẽpni, jeádih, baácdihbʉt chãjni, meemdíh ã teo wáaca naáh. Dios tʉ́ini yoobát jʉmna, meemdíh eníhcannit ĩ wẽpatdih dʉ́ʉc wáina, meemdíh ã míic mao yap yohat tʉ́ʉtʉp be!” ãt niíj wẽi naáwáp wʉt jĩ. Páant ã niiját tʉ́ttimah, Abram ã jwʉ́ʉb dʉ́ʉc wáini bií déenadih diez poómp chãjnit, Melquisedecdih biíc poómp ãt wʉ̃hʉp wʉt jĩ. Sodoma tʉ́tchidih bóo maáh, ãí h cãá cwãdihjeh ʉbnit, bií déenaboodíh Abramdih ãt chãwáát tʉ́ʉtʉp wʉt yʉh jĩ. Obohjeéhtih, Abram caandíh nin pah ãt niíj jepahap wʉt jĩ. “Meemjéh ma bíbohoó. Weemdíh wʉ̃hna nihna, ‘Weém caandíh bií déenadih wã wʉ̃hat jíib, dawá bií déena bíbohni Abram ã jʉmna caá’, mata niij tága”, ãt niíj jepahap wʉt jĩ. Pánihna, Abramboó Sodomadih bóo maáíh bií déenadih ãt ʉbcap wʉt jĩ.
14
Agar Ismaeljĩh ĩ jʉmat Génesis 16 Abram áa Sarai, weh wihcannih mit jʉmʉp wʉt jĩ. Caántdih teo wʉ̃hnih Agar wʉ̃t jʉmnih, Egipto baácdih bóli mit jʉmʉp wʉt jĩ. Pánihna, “Weemdíh Dios weh wihcannih ãt chãjap tagaá”, niijnít, Saraiboó Abram Agarjeéh ã jʉmat pínah niijná, caandíh mit wʉ̃hʉp wʉt jĩ. “Agarjeéh ma jʉmʉʉ́. Caántboó wébít bid jʉinít, weemdíh mi weh jʉm wʉ̃hbipna caá. Páant mi weh jʉm wʉ̃hʉchah, caán wébítboó wã wʉ̃ʉ́h pah ã jʉmbipna caá”, Abramdih Sarai mit niijíp wʉt jĩ. Páant mi niijíchah joinít, Abrambʉt ãt tʉ́i jepahap wʉt jĩ. Sarai caandíh páant mi niiját, Dios ã
15
jenah joyát ãt nihcap wʉt jĩ. Mi jenah joyátjeh páant niijnít, queét chénat pah Diosdih ĩt yap yohop wʉt jĩ. Pánihna, Abram Agarjeéh ã jʉmat tʉ́ttimah, mit wʉdʉ jʉmʉp wʉt jĩ. Pánih wʉdʉ jʉmna, mi maáh wilidih mi en íijatdih ennit, Saraiboó “¡Weemdíh Agar mi eníhcat míih jíib caá”, Abramdih mit niijíp wʉt jĩ. Pánihna, Abram Saraidih “Meemjéh ma jéihyep. Ded pah chãjíhna, ma chãjaá. Caántboó meemdíh teo wʉ̃hnih caá”, ãt niijíp wʉt jĩ. Pánihna, Sarai Agardih yeejép mi chãjachah, mi maáh wilidih mʉʉ́ wihcapna mit jwei béjep wʉt jĩ. Páant caanná mi jwei béjechah, Dioíh ángel caántdih ãt jwãááp wʉt jĩ. Pánih jwãáhnit, —¿Saraidih teo wʉ̃hnih, dépanih tigaá ma jweí? ãt niijíp wʉt jĩ.
16
—Wã maáh wilidih jweiná caá, wã chãjap, mit niíj jepahap wʉt jĩ. —Jwʉ́ʉb bejnit, ded pah ma maáh wili mi niijátdih ma jepahaá. Meém newé weépdih tʉ́ʉhnit, caandíh Ismael ma wʉ̃t bʉ́ʉdhbipna caá. Caánboó dawá yoobát jenah enna bʉʉjácan naáhwã ã jʉimená ĩ jʉmbipna caá, Dioíh ángel Agardih ãt niijíp wʉt jĩ. Pánihna, Agar Abramdih newé weép mit weh jʉm wʉ̃hʉp wʉt jĩ. Abram ã wʉ̃ʉ́hdih Ismael ãt wʉ̃t bʉ́ʉdhdʉp wʉt jĩ. Ã wʉ̃ʉ́h Ismael ã cã́ac jʉm láa Abram ochenta y seis jópchi ãt bíbohop wʉt jĩ. Pánihna, Abram biíh wilijĩh ã wʉ̃ʉ́h ãt bíbohop wʉt jĩ. Páant ĩ weh jʉmat Dios ã jenah joyát ãt nihcap wʉt jĩ. Diosboó Abramdih “Ma wʉ̃ʉ́h, ma bíbohbipna caá”, ãt niijíp wʉt jĩ. “Ma wʉ̃ʉ́h, ma jʉimená”, niijná, “Sarai wʉ̃ʉ́h pínahdihjeh”, niijná,
17
ãt chãjap wʉt jĩ. “Dawá ma jʉimená ĩ jʉmbipna caá”, niijná, Sarai mi wʉ̃ʉ́h, ã jʉimená pínahdih niijná, ãt chãjap wʉt jĩ. Agar mi jʉimenádih Dios ãt niijcáp wʉt jĩ. Agar mi jʉimenábʉt dawá ĩt jʉmʉp wʉt jĩ. Obohjeéhtih, queét mácah ĩt jʉmʉp wʉt jĩ.
Dios Abram biícdih ã jʉmat pínah naáwát Génesis 17 Pánihna, Abram noventa y nueve jópchi ã bíbohochah, Dios caandíh jígohnit: —Weém Dios Chah Wẽpni caá. Pánih wẽpni jʉmna, ma jʉimená dawá ĩ jʉmat pínahdih wã cãá c pooabipna caá. Queétboó dawá yoobát ĩ jʉmbipna caá.
18
Pánihna, bʉʉ, Abram, ma wʉ̃t jʉmatdih tʉ́ʉt nʉʉmnít, Abraham ma wʉ̃t jʉmna caá. ‘Abraham’ niijná, ‘Nihat baácdih moón ĩ nʉo’, niijná ãt chãjap wʉt jĩ. Majeéh bóli Saraibʉt mi wʉ̃tdih tʉ́ʉt nʉʉmnít, Sara mi wʉ̃t jʉmna caá. ‘Sara’ niijná, ‘Nihat baácdih moondíh ĩ éet pínah caá’, niijná ãt chãjap wʉt jĩ. Caántboó bʉʉ láa ma wʉ̃ʉ́hdih mi weh jʉmbipna caá, Dios ãt niijíp wʉt jĩ. Páant ã niijíchah joinít, Abraham baácboó páah yoh ñajnit, bʉ́dí ãt dehwep wʉt jĩ. —Páant weém cien jópchi bíbohni, wãjeéh bóli Sara noventa jópchi bíbohnih pohba mi weh jʉmmin niít? Abraham ãt niijíp wʉt jĩ. —Obohjeéhtih, majeéh bóli Sara newé weépdih mi tʉ́ʉhbipna caá. Caán ma wʉ̃ʉ́hdih Isaac ma wʉ̃t bʉ́ʉdhbipna caá. Pánihna, bʉʉ meemjéh, ma wʉ̃ʉ́h
19
́ Ismaeldih, nihat majeéh jʉmnit neonádihbʉt ĩih quehli nah yapat chóodih ma bóod yohoó, Dios Abrahamdih ãt niijíp wʉt jĩ. Páant Dios ã niijíchah joinít, nihat neoná wébít, japata, behnitdihbʉt bid wáacnit, queétdih Abraham ãt bóodop wʉt jĩ. Dios ã wʉtatdih Abrahamdih jepahat ãt náahap wʉt jĩ.
́ c panihnijeh Dios Cãa Abraham pebh ã jʉyát Génesis 18 Biíc yeó jáap Dios, cãá c panihnijeh, Abrahamdih enedih ãt jʉyʉ́p wʉt jĩ. Ãjeéh chénewã caandíh pej jʉm jʉ̃óhnit ángelwãbʉt ĩt jʉmʉp wʉt jĩ. Yeó jáap tac yoób tʉbit ã chãhachah, Abraham ãí h mʉʉ́ jẽcdih ãt en chʉ́ʉdʉp wʉt jĩ. Páant ã en chʉ́ʉdʉchah, biíc peihcannit neoná ã pebhna ĩ jʉ̃ʉ́wʉ́chah ennit,
20
jwãáh bac bej, queétdih mʉj tewat dée chãjna, baácboó ãt páah yoh ñajap wʉt jĩ. Pánih baácboó ́ jítchanadih ĩ páah yoh ñajniji ñah ñʉhnit, ĩih chocat pínah niijná, waícanjeh ãí h mʉʉ́boó mahdih jʉibí ʉbnit, ãt jʉí wʉ̃hʉp wʉt jĩ. Pánih wʉ̃h péanit, waícanjeh yaddih pan ãt chãjat tʉ́ʉtʉp wʉt jĩ. Tʉ́ini nʉñʉ́pdih ñíonit, caandíh teo wʉ̃hnitdih mawat tʉ́ʉtnit, ãt pʉʉbát tʉ́ʉtʉp wʉt jĩ. Pánihna, nihatdih péa beedánit, queét jʉinítdih Abraham jeémát ãt wʉ̃hʉp wʉt jĩ. Páant jeémát ã wʉ̃hʉchah jeémpnit, biíc Abrahamdih nin pah ãt niíj ʉʉ́bh joyóp wʉt jĩ: —¿Dee yoob tígaá majeéh bóli Sara mi jʉm? —Mʉʉ́ diítboó mi jʉmna caá,
21
Abraham ãt niíj jepahap wʉt jĩ. —Biíh jópchidih majeéh bóli ma wʉ̃ʉ́hdih mi weh jʉmbipna caá, Dios Abrahamdih ãt niijíp wʉt jĩ. Abrahamdih páant ã niíj naáwáchah, bih joinít, Sara caántjeh mit dehwep wʉt jĩ. —¿Dépanih tigaá, Sara mi deoh? Dios ãt niijíp wʉt jĩ. —Wã deohcan caá, mit niíj jepahap wʉt jĩ. —Ma deohna beé, Dios caántdih ãt niijíp wʉt jĩ. Pánihna, ded pah jwĩ jenah joyátdih Dios ã tʉ́i jéih beedána caá. Ded caandíh ã jéih bih niijcán caá. Chaíhjeh jwĩ boto wéheatdih ã tʉ́i joí beedána caá. ́ caolih Caán Dios yoobát caá. Ded pah jwiít jwĩih diítboó jwĩ jenah joyátdih, ded pah jwĩ jʉmatdihbʉt ã tʉ́i jéih beedána caá.
22
Sodoma, Gomorradihbʉt Dios ã yohat Génesis 19.1-29 Abraham pebh jʉinítji yap bejna, chéne ángelwã Lot ã jʉmni Sodoma tʉ́tchina cheyeh ĩt jʉibínap wʉt jĩ. Lotboó queétdih ãí h mʉʉná ʉb bejnit, ãt nʉmah jeémép wʉt jĩ. Queét jib jʉ̃óhnit ĩ bid jeémp péaat tʉ́ttimah, caán tʉ́tchidih moón
23
japata, behnit biícdih Lotíh mʉʉná jʉibínit, “Ninjĩh chéne neoná ma pebh jʉinítdih jwĩ yéej chãjat pínah niijná, jwĩ pebhna ma wah baca boó”, ĩt niijíp wʉt jĩ. Obohjeéhtih, Lot queétdih ãt jepahcap wʉt jĩ. Páant ã jepahcah, Sodoma tʉ́tchidih moón queét jʉinítdih tewíhna, Lotdih yeejép pohba ĩt niijíp wʉt jĩ. Páant yeejép ĩ niijíchah joinít, ángelwã queét yeejépwãdih jéih encannit ĩt chãjap wʉt jĩ. Pánihna, caán tʉ́tchidih moón jéih encannit, páantjeh ĩt bʉʉg láj jwʉ́ʉb bej ñʉhʉp wʉt jĩ, bʉca. Páant ĩ jʉmʉchah, ángelwã Lotwãdih ĩt jwei bác bejat tʉ́ʉtʉp wʉt jĩ. “Dios waícanjeh nin tʉ́tchidih ã cáo yoh beedábipna caá. Pánihna, jwei béjna, ñi en jwʉ́ʉbaca bojoó”, Lotwãdih ĩt niíj naáwáp wʉt jĩ. Pánihna, Lot, yad, chéne ã weh yatá biícdih ĩt jwei bác bejep wʉt jĩ.
24
Obohjeéhtih, queét ángelwã “Ñi en jwʉ́ʉbaca bojoó”, ĩ niijíchah joiná yʉhna, Dios Sodomadih iigní dahna ã wahni bʉʉgʉ́chah, Lot áa mit en jwʉ́ʉbanap wʉt jĩ. Páant mi en jwʉ́ʉbat jíib, nʉ́ʉmni nahjeh mit jʉmah bejep wʉt jĩ. Lot áa Diosdih mi yap yohatji jíib páant mit yapap wʉt jĩ. Pánihna, Dios ded pah ã niijíchah, queétdih tʉ́i jepahat ãt náahap wʉt jĩ. Bʉʉ, jwiítdihbʉt naóhna caá ã chãjap. Jwiít jwĩ yap yohochah, bʉʉ láabʉt biíc yoobó Dios ã peéh chãjbipna caá. Pánihna, Diosjeéh tʉ́i biícdih jʉmat tʉ́ʉt niijná, ã niijátdih tʉ́i jepahat caá náahap. Páant jwĩ jʉmʉchah, Dios bʉ́dí ã wẽina caá.
25
Lot weh yatá ded pah ĩ íipdih ĩ chajat Génesis 19.30-38 Pánihna, nihat Sodoma, Gomorra tʉ́tchina, biíh tʉ́tchinadihbʉt yeejép chãjnit ĩ jʉmat jíib, Dios nihatdih ãt cáo beedánap wʉt jĩ. Dios ã wahnit ángelwã Lotwã ĩ jwei bácat tʉ́ʉtat tʉ́ttimah, Zoar tʉ́tchiboó ĩt jʉibí jʉmʉp wʉt jĩ. Obohjeéhtih, Dios Sodomadih iigát ã wahachah, yad tac pʉ́ʉd ennajeh nʉ́ʉmni nah mi jʉmʉchah
26
enniji, bʉ́dí ʉ́ʉmna, caán Zoar tʉ́tchiboó ãt jʉmíhcap wʉt jĩ. Pánihna, ã weh yatádih jeéboojéh ãt nʉmah jʉmʉp wʉt jĩ. Pánih caánboó ã nʉmah jʉmʉchah, ã weh yatáboó bita neoná wihcah enna, ĩ íipdihjeh máihñanit, caánjeéh ĩt jʉmʉp wʉt jĩ. Páant ĩ chãjatdih ĩ íip ãt noón jéihcap wʉt jĩ. Ĩ íipdih máihñanit, ãjeéh jʉmna, queét yaádh wébít ĩt bid jʉyʉ́p wʉt jĩ. Pánihna, yad jeñé newé weépdih tʉ́ʉtnit, mi wʉ̃ʉ́hdih Moab mit wʉ̃t bʉ́ʉdhdʉp wʉt jĩ. Ã jʉimená moabítawã ĩt jʉmʉp wʉt jĩ. Yad jʉpʉbʉt newé weépdih mʉntih tʉ́ʉtnit, mi wʉ̃ʉ́hdih Ben-Amí mit wʉ̃t bʉ́ʉdhdʉp wʉt jĩ. Ã jʉimená amonitawã ĩt jʉmʉp wʉt jĩ. Tʉ́ttimah, queét moabitawã, amonitawãbʉt Abrabam jʉimenádih eníhcannit ĩt jʉmʉp wʉt jĩ. Pánih eníhcannit jʉmna, bʉ́dí pohba míic mawat ãt jʉmʉp wʉt jĩ, bʉca.
27
Abraham, Abimélecjĩh ded pah ĩ jʉmat Génesis 20 Tʉ́ttimah, Abraham Guerar tʉ́tchina ã bejechah, “‘Weém, Abraham jwan caá’, ma niijí”, yad Saradih ãt niijíp wʉt jĩ, páant mʉntih. Pánihna, Guerar tʉ́tchidih bóo maáh Abimélec, Saradih yad pínah ãt ʉb bejat tʉ́ʉtʉp wʉt jĩ. Caan chéi Abimélec ã oo jʉ́mʉchah, Dios caandíh jígohnit, “Saradih ma áa pínah ma ʉbca bojoó. Caántboó Abraham áa caá. Caántdih teona, meém, míih cãá cwã yʉh bʉca, ĩ wʉn beedbípna caá. Waícanjeh mi áa Abrahamdih ma jwʉ́ʉbanaá”, ãt niijíp wʉt jĩ. “Obohjeéhtih, Abraham weemdíh ‘Wã jwan caá’, ã niijíp be. Páant ã niijíchah joinít, wã ʉbʉp be”, Abimélec Diosdih ãt niíj jepahap wʉt jĩ.
28
Páant oo máh Dios ã niijátjidih joiníji, cheibit jáanit, caandíh teo wʉ̃hnit nʉmp jʉmnit maátadih ãt bid wáacap wʉt jĩ. Pánih bid wáacnit, ded pah oo máh Dios ã niijátjidih queétdih ãt naáwáp wʉt jĩ. Pánih naóh péanit, Abrahamdih bid bojnit, nin pah ãt niíj ʉʉ́bh joyóp wʉt jĩ: —¿Dépanih tibeé weemdíh “Wã jwan caá”, ma niíj yee naóh? ãt niijíp wʉt jĩ. —“Weemdíh ã mao yohbipna caá”, niíj jenah joinít, páant wã niijíp be, Abraham ãt niíj jepahap wʉt jĩ. Sara jíib, Dios ã peéh chãjachah, Abimélecwãdih bʉ́dí pohba wʉnat ãt jʉmʉp wʉt jĩ. Pánihna, Abimélec, Abraham, yaddihbʉt ã jwʉ́ʉbaat pínah jãt́ ih, Abrahamboó Diosdih ãt ʉʉ́bʉ́p wʉt jĩ. Páant ã ʉʉ́bʉ́chah, Abimélec Diosdih ã tʉ́i jepahat jíib, Dios nihat queétdih ãt booa beedánap wʉt jĩ.
